“Kitob dunyosi” –
маънавий-маърифий, ижтимоий-сиёсий газета.
2012 йил 26 январда қайта рўйхатдан ўтган.

Муассис:
“Tafakkur bulog‘i” масъулияти чекланган жамияти

Барча ҳуқуқлар қонунлар билан ҳимояланган. Сайт маълумотларидан фойдаланилганда манба кўрсатилиши шарт.

Ёғсанг ёғ, Қаршининг ёмғири!

Шаҳриёр ШАВКАТ

* * *

Шундай расм чизсанг, тўймасанг кўриб,

Шундай расм чизсанг, йўғрилса ҳавас,

Чизсанг, қалам тутиб ё хаёл суриб

(Бунинг учун рассом бўлиш шарт эмас!).

Шундай расм чизанг, ўнгланса тушлар,

Қатор-қатор бўлиб, бузилмай сафи,

Симёғоч торига тизилган қушлар,

Чуғурлашиб турса марварид каби.

Чизсанг юзда қолган меҳр тасвирин,

Қизариқ юракка этолса таъсир,

Ширин тасвир бўлса, шуқадар ширин

Ўпилмаган қизнинг лабидек тасвир.

Чизсанг томчиларни булутлар билан,

Шафақни куйдирган қуёш изларин,

Ҳатто келиб турса тасвирларингдан

Ёмғирдан кейинги тупроқ ислари!

Чанасини тортган болани чизсанг,

Этикчаси тойиб-тойиб кетишин.

Тишин тиққиллатиб жилмайса аранг,

Юзчаси қизариб бурун тортишин

Чизсанг!

Шамолларни чизсанг ўз рангги билан,

Сочингни тўзғитган озод шамолни.

Кўзингга энг таниш байроқ бағридан

Оқиб-оқиб турган озод шамолни!

Маломат чекиблар қолишса чунон

Дунёнинг жамики малолатлари.

Шундай расм чизсанг, унда ҳеч қачон

Бўлмаса бахтсизлик аломатлари!

 

* * *

Куч бер қўлга, билакка куч бер,

Ким ўзини ёв каби тутган,

Ким дўст бўлиб ёвданам ўтган.

Ё ота, деб кўтар, эй Ёдгор!

Ё ота, деб кўтар, эй Ёдгор,

Сенинг отанг Алпомиш ўтган!

Хўрлик бекор, ҳақорат бекор,

Ким шоҳ бўлиб, элин унутган,

Ким қултойлик енгини тутган.

Ким ошини индамай ютган,

Ким бошини дорларга тутган,

Ё ота, деб кўтар, эй Ёдгор!

Ё ота, деб кўтар, эй Ёдгор!

Аждодларинг сарбадор ўтган.

Отанг бозор, ҳам онанг бозор,

Даланг мозор, остонанг мозор,

Сандиқларни босгунча моғор

Ким милтиғин қўрқиб беркитган.

Ким қўшнисин уйини титган,

Ким ёв учун оғасин тутган,

Ё унутган, ё эсда тутган,

Ё ота, деб кўтар, эй Ёдгор!

Аждодларинг «босмачи» ўтган.

Бугун бошда озодлигинг бор,

Яхши ажрат, яхши ёмонни,

Сендан бошқа кўтаролмайди

Ўн тўрт ботмон

Ўзбекистонни!

Ким ҳали ҳам ҳақни беркитган,

Ким писиниб, вазият кутган,

Ким ўз йўлин вақтида тутган,

Ким Ватан деб баралла айтган!

Ё ота, деб кўтар, эй Ёдгор!

Аждодларинг паҳлавон ўтган!

 

* * *

«Мен бошқани севаман, кечир,

У ҳам гўзал, ёқимтой, лайли,

Гар алдасам, лабини тишлаб,

Қовоғини уйиб қарайди!»

Бу сўзимдан қўрқиб кетди қиз,

Шарт қаради кўзлари кўзгу.

«У ким?» – деди,

Лабини тишлаб,

Қовоғини уйиб олиб У!

 

* * *

Тушларимда кутдим ташрифингизни,

Кўргим келган эди сизни жуда ҳам.

Тушларимда кутдим… (қачон дейсизми?)

Сиз бошқа тушларда кезаётган дам.

Шу кеча кўксимдан нимадир босди.

Очиғи, оғриқдан ранжимаганман.

Лек жуда азият чекаман рости

«Ҳеч қачон», «ҳеч ким» ва «ҳеч нима»лардан…

Гарчи ачинишга мудом маҳкумман,

Лек бир сўз устида узоқ ишладим.

Қушдек учаётир тушдек умримдан

Сизсиз кўраётган ҳамма тушларим.

 

* * *

Сизга оқ ранг ёқмас экан-а?

Нима қилай, нетайин энди?

Кўйлагимдан кўнглимгача то

Оқ рангда эди!

Сизга ёқар экан

Қоработирлар,

Қора кўзойнагу, қора машина.

Ёқмаслиги аниқ бизнинг адирлар,

Кетмон билан ўйиб ишланган зина!

Сизга ёқар экан қоп-қора бархан,

Қора марвариду, қорароқ инжу.

Ҳа-я, мен далада кетмон чопганман,

Юзим сал қорароқ, ёқмайдими шу?!

Сизнинг суюк гўша – ҳаводан йироқ

Қора олтин хароб этган тор шаҳар,

Менинг маконим-чи, ажойиб қишлоқ,

Оқ олтинлар оппоқ унган далалар!

Ҳали ҳам бир ўйлаб кўринг-а, тиниб

Бироз ёқса керак орзунинг иши –

Оқ либосда турган келинни келиб

Оқ отли шаҳзода олиб кетиши?!

 

* * *

Шамоллар шовуллаб шамолладилар,

Усма-уст хотирим саволладилар,

Тиз чўкдим. Қўл ёйдим. Не бўлса-бўлар;

Осмонга қадалди кўзимнинг қири –

Ёғсанг-ёғ, Қаршининг ёмғири!

 

Ўйлайман: ҳаракат, ҳаражат, ҳужжат.

Кимда камомад кўп, кимда даромад,

Умримга ачиндим, умримга фақат,

Барига кўникиб қўйдим охири,

Ёғсанг-ёғ, Қаршининг ёмғири!

 

Қизиғи қолмади ҳатто тариқча,

Қизиқмас, уммонми ёки ариқча,

Мана мен кўлмакда тиллабалиқча,

Манa мен ёқаси йиртиқнинг бири!

Ёғсанг-ёғ, Қаршининг ёмғири!